القائمة الأقباط اليوم أبحث
أهم الأخبار

تداول فيديو لرجل يصفع طفلا داخل سوبر ماركت بالمنصورة.. ووالده: «عايز حق ابني» (فيديو)

تداول فيديو لرجل يصفع طفلا داخل سوبر ماركت بالمنصورة.. ووالده: «عايز حق ابني» (فيديو)
المصرى اليوم
| 09 ابريل 2021
تداول نشطاء على مواقع التواصل الاجتماعي في محافظة الدقهلية، اليوم، فيديو اعتداء رجل على طفل لا يتعدى عمره 8 سنوات بإحدى سلاسل السوبر ماركت في مدينة المنصورة.

وظهر بالفيديو رجل يتفقد المشتريات ويقترب منه طفل صغير ويدور حديث لمدة ثوانى بينهما، قبل أن يقوم الرجل بصفع الطفل على وجهه فيسقط على الأرض من شدة الصفعة.

وسادت حالة من الغضب بين رواد مواقع التواصل الاجتماعى بسبب الواقعة مطالبين بحق الطفل وتحديد شخصية الرجل الذي ضربه واصفين الواقعة بالوحشية.

وقالت مروة أحمد ماهر، صاحبة شركة، وأول من نشر الفيديو، لـالمصرى اليوم: الطفل اسمه سامح محمد خليل، عمره 8 سنين، والده يعمل سايس في الجراج الموجود بجوار السوبر ماركت الذي ظهرت فيه الواقعة.

وأضافت: البداية إنى لقيت استغاثة منشورة من والد الطفل على الفيس بوك ومرفق بها الفيديو فإستفزنى جدا لأن مفيش بنى آدم سوي يعمل كده في طفل، فتوجهت للمكان لأنى من سكان مدينة المنصورة وشفت الولد وسمعت تفاصيل ما حدث، وبعدين أخدتهم وتوجهنا للنيابة العامة وحررنا محضر ضد الرجل ده لأن لازم يتحاسب على تصرفه ده، لأني تخيلت إن ابني يكون في الموقف ده مكان سامح، وعلشان كده نشرت رقم تليفونى علشان أي حد يعرف الرجل ده يتصل بى لازم نلاحقه بالقانون.

وعن الواقعة، قالت: دخل الطفل السوبر ماركت لأجل أن ينبه الرجل أن سيارته تقف أمام مدخل الجراج الذي يعمل فيه والده، فلم يستجيب الرجل، ما دعا الطفل أن يكرر: (يا عمو في ناس عايزه تخرج)، فضربه بهذا الشكل الوحشى.

وأضافت: تواصلنا مع المجلس القومى للأمومة والطفولة فأرسلوا محاميا لمتابعة المحضر الذي حرره والد الطفل.

وتابعت: إحنا عايزين حق سامح وحق كل طفل ممكن يتأذى ويهان بالشكل ده.

ومن جانبه، قال محمد خليل والد الطفل سامح: أنا كنت عند الدكتور بأكشف على بنتى ولقيت اتصال من سامح بيبكى ويقولى واحد ضربنى يا بابا.

واضاف متأثرا: بعد لما رجعت البيت لقيت سامح نايم وتعبان وشكله حزين ومكسور، فسألته مالك قالى الرجل ضربنى جامد أوى يا بابا ولقيت أثار أصابع الرجل ظاهرة في وشه، فاتجننت من المنظر وروحت السوبر ماركت تانى يوم أشوف الكاميرات ولقيت الكل متأثر من الموقف، وأول ما شفت الفيديو انهرت لأن محدش طبيعى يضرب طفل بالقسوة دى، فعملت استغاثة ومحضر علشان أعرف مين الشخص ده واخد حق ابنى.

وتابع منفعلا: أنا عايز حق ابنى اللى اتهان وانضرب واتكسر بالشكل ده بدون ذنب.

وطالب الأب الأجهزة الأمنية في محافظة الدقهلية بسرعة ضبط المتهم بضرب ابنه، قائلاثقتى كبيرة في الشرطة والنيابة أنهم هيساعدونى آخد حق ابنى.
×