بـ65 كلمة وضعها ليجعل حسابه مختلفًا، حصل شاب مصرى على لقب أطول اسم على حساب في تاريخ موقع التواصل الاجتماعي فيسبوك.
أحمد مجدى مصري، عمره 16 عامًا، قام بإنشاء الحساب قبل 3 سنوات، عن طريق إرسال بطاقة هوية مزورة إلى إدارة فيس بوك، ونجح في أن يضع عدد الأسماء الـ65: الفكرة جاءت منذ فترة، وتم تنفيذها لكن الكلمات الـ65 لم أضع منهم سوى 3 أسماء فقط من اسمى، والباقي أسماء جميع أصدقائى وأسماء أخرى عشوائية.
الفكرة غير مسموح بها من إدارة فيسبوك حاليا، ولا يستطيع أحدًا على فعلها: كان في لينك زمان من 3 سنين تقدر تغير منه اسم الفيسبوك بتاعك بأي عدد انت عاوزه، وكان لازم يبقي في بطاقة هوية، وكنت لسه عندي 13 سنة، فعملت بطاقة مزورة على فوتوشوب ونفذت الفكرة.
غلق الحساب 7 مرات
وضع أحمد، ابن مدينة الإسكندرية، 65 اسم على الحساب، ليجعل حسابه مختلفًا، ولكن الفكرة كانت ضد قواعد موقع فيسبوك، الذي قام بغلق الحساب 7 مرات، ولكن في كل مرة نجح أحمد في استرجاع حسابه بطرق مختلفة.
فيسبوك دلوقتي مش زي زمان، والقواعد بقت صارمة أكتر، الكلام ده مش مسموح خالص دلوقتي، عشان كده حاولوا يقفلوه 7 مرات، وكل مرة بقدر إني أرجعه بسهولة.
ضجة كبيرة على فيسبوك
أثارت غرابة الأسم ضجة كبيرة على مواقع التواصل الاجتماعي، وصل الأمر إلى أن العديد من الأشخاص، عرضوا شراء الحساب من أحمد، مقابل مبالغ ماليه 500 جنيه، لكنه رفض بيعه، وبعضهم طالبه بإنشاء حساب مماثل بينما هدده آخرون بإغلاق الحساب.
الأكونت شخصي وعليه صحابي وقرايبي عشان كده موافقتش أبيعه، وردود الفعل كانت مختلفة، في ناس مثلاً هزرت معايا وبيقولولي أبوك شغال في السجل المدني ولا ايه، بس عامة أنا شايف إن الموضوع عادي.
