حبه كراسي وكنب
شويه بشر بدون ضمير
كانزات ومايه وعنب
وارمي القانون ف البير
ومتنساش واحد شيخ وابونا
لزوم البوسوالتصوير
الطريقه:
هات لنا واحد مظلوم
يكون مسيحي او غلبان
وسط القعده
رش عليه معلقتين
ترهيب وجنان
وصراخ الناس البعده
علي نار حاميه سويه
وبالمره والعيال هدد فيه
فهمه يا الدفع يا الحبس
ونولع ف غيطه
ونجيب عاليه واطيه
متنساش اهم تركه ف الوصفه
تصوره وهو فاتح بقه
م الخد للخد
حتي لو سارقينه
وحتي لو بيته اتهد
وكبارات البلد
يكونوا حاضرين
عشان يدوقوا الطبخه
ويمضوا ع الظلم
والكلام يبقي فعلا
جد الجد
وبكده نكون خلصنا
طريقه عمل الجلسه العرفيه
اللي طلعت أسهل بكتير
من وصفه الفول والطعميه
وقدرت تلغي وجود القانون
وتبيع ببساطه القضيه
اتمني يكون عجبكم
طعم لحم المظلوم
واللي انطرد من بيته
واتذل 100 مره
ف اليوم
ياخساره
ياخساره يابشر الضماير
وشكلكوا قدام العالم
ف اللي جري واللي صاير
وف رب يوم هتقابلوة
ييجي دوركوا
وساعتها
هيقطع هو لحمكوا
نساير نساير
نورا فريد
