أعربت الفنانة حورية فرغلى، عن سعادتها بالحب الغامر الذى استقبلته من جميع المصريين فور عودتها إلى القاهرة بعد رحلة علاج فى أمريكا أستغرقت أشهر لإجراء عدة عمليات تجميلية بأنفها.
وقالت "فرغلى"، خلال حوارها مع برنامج "تحت الشمس" المذاع على قناة "الشمس": "الإصابة ابتدت منذ 9 سنوات، كنت فى منتخب مصر للفروسية، والحصان وقع فوقيا وكسرلى مناخيرى تماما، ورحلة علاجى مرت على بلاد كتيرة أوى، زى فرنسا والنمسا وبريطانيا والسويد والدنمارك وغيرها، لحد ما وصلت أمريكا".
وعن أصعب المواقف التى مرت عليها فى حياتها قالت: "اتقالى إن عمليتى صعبة جدا من كتر العمليات اللى عملتها، كنت عملت 11 عملية قبل ما أروح أمريكا، وكتر العمليات طبعا بوظت الدنيا أكتر، الدكتور قالى لازم تقعد معايا هنا 4 شهور لأنى عملت العملية على 4 مرات".
أما عن حالتها الصحية خلال إجرائها للعملية الجراحية كشفت حورية فرغلى قائلة: "خلال الـ4 شهور دول كنت باخد جلسات أكسجين كل يوم، لأن الدم مكنش واصل للمناخير، وأول عملية أخدت 11 ساعة تقريبا، وكانت مؤلمة جدا، والاتنين اللى بعدها كانوا عاديين، والرابعة ودونى المستشفى كذا مرة ورجعت عشان مكنوش لاقيين العروق فى جسمى خالص".
مضيفة: "الحمد لله أنا دلوقتى شكلى أحسن بكتير طبعا، اللهم لك ألف حمد وشكر وده بفضل دعاء الناس ليّا، وبقيت أشم دلوقتى أكل وبقيت أجوع والحمد لله".
