مرة وأنا في الدير، جه شاب وقال لي: «أنا قررت أخطب».
قلت له: «خبر جميل».
سألته: «ناوي تختار على أي أساس؟»
قال لي: «عايز أجمل واحدة ممكن تتشاف. عايز صحابي يقولوا واو».
يعني كان معيار الاختيار عنده حاجة واحدة بس: الجمال.
وبالفعل، ربنا وفقه بواحدة جميلة، واتجوزوا.بعد حوالي ست شهور، لقيته جاي لي الدير وعايز يقعد يومين، استغربت وقلت له: «لسه متجوز جديد وعايز تقعد في الدير؟».
قعد يحكي وقال:«عندنا مشكلة كبيرة. مش لاقي موضوع أتكلم معاها فيه. كل كلامها عن اللبس، الموضة، المكياج، الأفراح، نلبس إيه ونعمل إيه».
قلت له:«إنت لما اخترت، ما اخترتش واحدة تقدر تتكلم معاها وتفهمك.إنت اخترت بمعيار واحد بس: الجمال.ربنا اداك اللي إنت عايزه، لكن دلوقتي لازم تتحمل نتيجة اختيارك».
ما ينفعش بعد ست شهور جواز تهرب وتقولي عايز أقعد في الدير.إنت اللي حطيت المعيار، وإنت اللي اخترت، وربنا دايمًا بيدينا أكتر من اختيار…
لكن المسؤولية في الآخر مسؤوليتنا.
يؤكد الأنبا مقار :"ربنا ما بيختارش لحد.ربنا بيحط قدامك اختيارات كتير، وإنت اللي بتختار.للولد وللبنت، في قبول أو رفض، لكن القرار في الآخر قرارك.ربنا بس بيديك إشارات: النوع ده ينفعك، والنوع ده ما ينفعكش، وإنت حر. بس خليك فاكر إن كل واحد مسؤول عن اختياره.
