قالت الإذاعية الكبيرة ميرفت القفاص أرملة الموسيقار الراحل عمار الشريعي:"10 سنوات مرت على رحيله ولكن هو بالنسبة لي موجود ماماتش".
نجل عمار الشريعي
وتابعت خلال لقائها ببرنامج "معكم" الذي تقدمه الإعلامية منى الشاذلي بقناة "سي بي سي":"عمار الشريعي سابلي حتة منه ابننا مراد وهو كان حاسس إنه مش هيكمل معاه فكان بيحاول ينقله كل خبراته قبل ما يتوفى في صورة حدوتة وغنوة من وهو صغير، وينقله كل حاجة هو عاشها".
مرض عمار الشريعي وحلم الإنجاب
وأضافت:"عمار الشريعي كان عايش بمرض القلب، وابننا مراد اتولد وعمار عنده 50 سنة، هو محسسنيش خالص ان حكاية الإنجاب مهمة، وقعدنا 7 سنين قبل انجاب مراد وحسيت انه مش مهتم ولا بيقول نروح لدكاترة، ولكن لما شفت احساسه بمراد قلت ده هو مبيبينش".
قصة حب عمار الشريعي
وأكملت:"قبل الزواج كان فيه 3 سنين قصة حب مع عمار الشريعي، واصحابه كانوا بيقولوا ليا هو مش هيتجوز ومتكمليش معاه قصة الحب لكن هو كان جاد ومكنش بيلعب".
بداية العلاقة مع عمار الشريعي
ولفتت:"انا كنت عندي برنامج في البرنامج الأوروبي وهو خريج اداب انجليزي، فكان من الطبيعي ادور علي فنانين ومثقفين بيتكلموا لغة انجليزية اعمل معاهم حديث، وفات 3 سنين علي البرنامج مجبتش عمار الشريعي، لحد لما سنة 1988 روحت سجلت معاه فأخدت معايا
واحدة صاحبتي ولما عرفنا بعض قاللى لما سلمتي عليا السلام كان فيه حرارة وبعد كده حصل صداقة ما بينا وبعدين انا انجذبت له وبسرعة لقيتني انه هو ده اللى هكمل معاه، وحسيت بصدقه وكان اللى حواليا بيقولولي ده مش جاد وابعدي بس انا صممت وفعلا اتجوزنا".
جدير بالذكر أن عمار الشريعي موسيقي مصري يعد من أبرز الموسيقيين المصريين في النصف الثاني من القرن العشرين، تميز عمار بموسيقى تيترات الأفلام والمسلسلات التي علقت بأذهان الناس؛ بالإضافة لتلحينه لعدد من الأغنيات لكبار المطربين المصريين والعرب ووضعه لموسيقى عشرات الأوبريتات والمسرحيات.
الدخول إلى الندوة والحفل الموسيقي مجاني؛ ويمكن الحصول على دعوات الدخول من شباك تذاكر المكتبة وهي متوفرة حتى نفاذ الكمية.
