انتشر على موقع التواصل الاجتماعي فيس بوك صورة تكشف عن موقف إنساني تعرض له أحد طلاب الثانوية العامة، قوبل بـ “جدعنة المصريين”
أظهرت هذه الصورة استغاثة طالب في الثانوية العامة عبر أحد جروبات فيس بوك قائلا : انا في تالتة ثانوي ومحتاج شغل 8 ساعات ضروري لإني بأصرف على نفسي.
ففوجئ طالب الثانوية العامة بأحد رواد موقع التواصل الاجتماعي فيس بوك يتفاعل مع منشوره ويرد عليه قائلاً : اعتبرني اخوك الكبير ، وقول لي بتاخد دروس عند مين ومحتاج لمواصلاتك اد ايه وماتشغلش بالك ركز بس في دروسك وفي الثانوية العامة واعتبر انك استلفتهم لحد ما تخلص امتحاناتك بإذن الله وابقى ردهم وقتها إنما دلوقتي ركز في مذاكرتك ودروسك.
ورد الطالب عليه : متشكر جدا لحضرتك ومقدر ذوقك وكرمك بجد بس انا مقدرش اقبل دا لاني اقدر اشتغل واروح واجي لكن في ناس كتير اوي محتاجه ومابتقدرش تشتغل ، اكيد حضرتك فاهمني وشكرا تاني ليك بجد انت شخص محترم وجميل وكريم.
وقال متابع آخر : حبيبي اعتبرني اخوك وانا ان شاء الله اسعادك بالي انت عايزه ، ع فكره انت شخص محترم وبتدور ع الحلال وانا هقولك حاجه انا لما كنت بدرس كنت كمان زي وضعك كده والحمدلله ربنا قواني واتخرجت وكان نفسي
الاقي شغل برضو والحمدلله بفضل ربنا دلوقتي انا موظف كويس جدا فيمكن فاتمنى انك تعتبرني اخوك فعلاً وتسمحلي اساعدك لحد م تلاقي شغل وابقا رجعهم ي سيدي لما تلاقي شغل بس بعد ما تتخرج من الثانويه انا مستني منك مسج بجد.
ثم بدأت التعليقات الداعمة للطالب تتوالى ، حيث قال عمار حكيم : انتا قدها فخور بيك انك بتحاول ، اتمنى تشد حيلك وتفرحنا كلنا اخر السنة ، وباذن الله ربنا هيفتحها في وشك وهتلاقي الخير كله ادامك
وقال شادي سنوسي : كل الدعم ي غالي ع سعيك ده ،وربنا اكيد هيكرمك ف الثانويه وانت بطل وقدها ي غالي
وقالت إنجي علي : أنت مثال الرجولة وعزة النفس وحاجة كده تفرح.. وبإذن الله ترجع بعد ما تحقق حلمك وتشوف البوست ده وتحمد ربنا على كرمه.
