أكد الفنان هاني شاكر أن مغني المهرجانات حمو بيكا استنفد فرصه في الحصول على تصريح بالغناء من نقابة المهن الموسيقية، لأنه تقدم أكثر من مرة ولم ينجح في الاختبارات، وقال شاكر: اللي اتعمل مع حمو بيكا متعملش مع حد تاني من اللي بيغنوا من الجيل ده.
وأوضح شاكر خلال استضافته في برنامج مصر جديدة مع الإعلامية إنجي أنور على قناة etc: جِبنا له مدرس مخصوص عشان مخارج الألفاظ والتركيز على إنه يغني صح، راح مرة واحدة ومراحش تاني.
وتابع شاكر: كان عليه حكم سنتين نهائي، اللي اتهجّم فيها وقال ححرق النقابة، وقبل التنفيذ، أنا والمجلس اتنازلنا عشان ميتحبسش، لو كنا نفذنا كان زمانه في حتة تانية، مش طلع بالحوار في البرنامج برمضان، ووالدته كلمتني كتير، وبسلم عليها، وكأب تأثرت بطلبها، وتنازلت عن الحكم.
وأوضح شاكر: مفيش بيني وبينه حاجة، الفن مش بالعياط، ومش كل اللي بيعيط بيبقى على حق.
ووجه شاكر رسالة إلى بيكا : دخلت الامتحان مرتين، وهذا لم يحدث مع أي حد، لو معاك حق اتقدم، وادخل مرة تالتة، دخل مرتين، الوحيد اللي جبناله من هذا الجيل مدرس في النقابة يعلمه، طب نعمل إيه تاني، ثم إن التاريخ
اللي قدمه والأغاني اللي غناها قبل كدة شىء مخزي وكلنا نتبرأ منها، ومن كلامها، وجاتلك فرصة مرة واتنين ولم يحالفك الحظ، ده لا يديك الحق إنك تطلع تعيط وتهاجم النقابة، هل أنا كنقيب أطلع أغني وأمتحن بداله ؟.
وتابع: مش ممكن أنا أو النقابة حنحط حد في دماغنا، ومش كل اللي بيعيط يبقى معاه حق، رغم إنك طلعت بتدعي عليا في رمضان، وأنا بشكرك.
