تصدر اسم الفنان ماجد الكدواني مؤشر موقع البحث العالمي جوجل وتريند مختلف مواقع التواصل الإجتماعي بعدما علق على أزمة الفنانة حلا شيحة والفنان تامر حسني عقب نشره فيديو كليب "بحبك" والذي تم تصويره لفيلم "مش أنا" قائلة "اتفقنا نمثل بس".
ونشر الكدواني، عبر صفحته الرسمية على موقع التواصل الإجتماعي فيسبوك"، مساء أمس الخميس، صورة لمشهد له مع الفنان كريم عبد العزيز في فيلم "حرامية في تايلاند"، حيث قام باستبدال وجه عبد العزيز بوجه الفنان تامر حسني.
وعلق على الصورة، قائلًا: "تامر إحنا اتفقنا نمثل الفيلم بس مش هطلع في كليبات أنا".
وكانت الفنانة حلا شيحة هاجمت الفنان تامر حسني عبر صفحته الرسمية على موقع تبادل الصور والفيديوهات الأشهر انستجرام بعد طرحه الكليب الذي يتضمن مشاهد رومانسية تجمعها به قائلة أنا اتفاجئت جداً بنزول كليب يجمع فيه مشاهد متفرقة من الفيلم و في أيام ذي الحجة أيام مباركة و خصوصاً بعد اخر بوست نزلته و وضحت فيه أنا إيه ".
وأكملت :" و اتفاجئت أكتر خصوصاً بعد وعد تامر حسني ليا وتأكيده أنه هيحترم رغبتي و بعض الطلبات اللي طلبتها منه بكل إحترام وود الصيف اللي فات ، أحنا يمكن نجحنا بمقايس الدنيا بس صدقوني بمقايس ربنا أحنا لم و لن ننجح ".
وتابعت : "أنا عارفة ومتاكدة أن زملائي جواهم خير بس للأسف فتنة الشهرة و النجاح مش بتخلينا نشوف ونقيس الأمور صح ،بتكلم من قلبي الكليب ده ميرضيش ربنا وأنا عيطت لأني شفت نفسي في المشاهد دي.. دي كانت زلة نتيجة ظروف مريت بيها وكلنا بنغلط و لازم نغلط علشان أحنا بشر بس المصيبة أننا بنغفل وبننسى ".
وأوضحت : " أنا مش حتكسف
من حد أنا تبت من المشاهد دي وهي لا تصح وأنا غلطت وبصلح وأهم حاجة إن ربنا يرضى عني لأن في الأخر ده اللي حينفعنا مش الشهرة ولا النجاح لا هو مش نجاح أصلاً علشان النجاح الحقيقي حاجة تانية خالص أحنا أغلبنا ناسينها إلا القليلين منا " .
وقالت : " الفن لو بيخلينا نبعد عن منهج ربنا ومنبقاش قدوة لأولادنا يبقي باطل وميبقاش فن ،أحنا كلنا عندنا إمتحان في الدنيا دي وحابة أفكرك بالفيديو ده يا تامر اللي قولت فيه أنا مش بتمنى أموت وأنا مطرب أنا دايماً خايف من كده.. كلام أكيد قولته في لحظة صدق جواك وجوانا كلنا ".
واستشهدت بآيه من القرآن " {إِلَّا مَن تَابَ وَءَامَنَ وَعَمِلَ عَمَلًا صَـٰلِاً فَأُو۟لَـئكَ یُبَدِّلُ ٱللَّهُ سَیِّـَٔاتِهِمۡ حَسَنَـٰت وَكَانَ ٱللَّهُ غَفُوراً رحيماً}.. الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد ".
ليخرج الفنان تامر حسني بعدها بساعات عن صمته من خلال منشور نشره عبر صفحته الشخصية على موقع التواصل الاجتماعي "فيس بوك" قائلًا: نهاركم جميل يا أغلى الناس الحقيقه عمري ما بتخيل إني أدخل في نقاش بالشكل دا مع زميل بحترمه و كان في بينا كل خير".
وتابع: "للتوضيح بما إنك يا حلا كتبتي بوست و أشركتي الجمهور الكريم معانا بدال ما كنتي تكلميني شخصياً و نتناقش بيني و بينك ، فا أنا مضطر أرد هنا برضو ... أولاً أنا عمري ما وعدتك إن الكليب مش
هينزل دا محصلش اصلاً يا حلا مش أنا خالص اللي أوعد و أخلف.. الحقيقه اني إحترمت كلامي معاكي و وعدتك أشيل مشاهد تانيه طلبتيها و شيلتها بالفعل و شكرتيني عليها".
"و لو حابه تفتكري المشاهد اللي اتشالت بعد اذنك روحي شوفيها في المونتاچ عند الأستاذ عمرو عاكف او كلميه يبعتهالك كلها موجوده ، و بعدين الفيلم بقاله 3 اسابيع في السينمات و الكليب موجود جوه الفيلم هو بالنسبالك الحرام إننا ننزل الكليب على اليوتيوب بس !! إنما الكليب يتشاف جوه السينمات عادي ؟؟؟؟ منطق غريب فعلاً يا حلا".
وأضاف: "و بعدين هو مش أنتي اللي مضيتي عقد و تقاضيتي عليه مبلغ كبير عشان الدور دا بعينه !!!!! هو مش إنتي اللي صورتيه و مثلتيه بنفسك و بمنتهى الرضا ولاّ حد أجبرك ؟!!!!!! و للتوضيح للجمهور الكريم أنا و المخرجه الأستاذه ساره وفيق بعتنالك و كنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظه تقوليها ، ماكنتيش بتردي علينا و تليفوناتك كلها كانت بتقفل في وشن".
واستكمل "تامر" قائلاً: "إنتي للأسف يا حلا متعاملتيش صح مع الموقف كان لازم تهتمي بأمرك أكتر من كدا و لو كان ليكي أي طلب تاني كنت هعمله بكل حب إنما إنتي فجأه أختفيتي و مكملتيش تركيب صوتك في الفيلم
ولا جيتي تتصوري عشان آفيش الفيلم أصلًا و مخليتيناش نعرف نعمل آفيش مجمع !!! و بقيتي تقفلي تليفوناتك و تكنسلي علينا كلنا و بعدين أي فيلم بيبقى ليه خطه مسبقه في الدعايه و انتي عارفاها كويس و وافقتي عليها".
واختتم "تامر"رسالته لحلا شيحة قائلاً: "دا كليب رومانسي يعني معقول كنتي عايزه المنتج يشيل كل مشاهدك اللي صورتيها من الكليب و يطلعني بغني و بقول الكلام الرومانسي
دا للأستاذ ماجد الكدواني مثلاً هو دا يُعقل ؟؟!!!!! أنا زعلان منك جداً يا حلا على مفردات البوست بتاعك الغير موفقه و مستحيل هرد بطريقتك اللي فيها تجريح و اتهامات باطله ليا
إحتراماً لحجات كتير يمكن فايتاكي بس مش هتفوتني و على فكره انا واثق انك عارفه اني مستاهلش منك كدا و هكتفي بالتوضيح دا و ربنا يهدي الجميع و يكتبلك كل الخير اللهم آمين"
